ფსიქიკური ჯანმრთელობის ცენტრი დაფუძნდა 2011 წლის ივნისში ფსიქიკური ჯანმრთელობის სფეროს განვითარება-ხელშეწყობის მიზნით - ილიას უნივერსიტეტს და ფონდ „გიფ-თბილისის“ (გლობალური ინიციატივა ფსიქიატრიაში-თბილისი) შორის გაფორმებული მემორანდუმის საფუძველზე.

ცენტრის ამოცანებია:

• ფსიქიკური სფეროს განვითარების ხელშესაწყობად რეგულარულად ჩაატაროს მაღალი დონის ტრენინგები, ვორკშოპები და სემინარები უცხოელი ექსპერტების მონაწილეობით;
• ხელი შეუწყოს  მთარგმნელობით და საგამომცემლო საქმიანობას, სამეცნიერო კვლევებს;
• უზრუნველყოს სტუდენტები და დარგის სპეციალისტები სპეცილიზებული ბიბლიოთეკის მომსახურებით. 

ფსიქიკური ჯანმრთელობის საუნივერსიტეტო ცენტრი 2012 წლიდან ასრულებს სამაგისტრო პროგრამის „ფსიქიკური ჯანმრთელობა“  ხელშემწყობ და გამაძლიერებელ ფუნქციას, როგორც ბიბლიოთეკის რესურსების ხელმისაწვდომობით, ასევე პროფესიული შეხვედრების და შესაძლებლობების გაზრდის სხვადასხვა აქტივობით. ცენტრი სამაგისტრო პროგრამის აღწერაში მოხსენიებულია მისი სივრცით, ბიბლიოთეკითა და ექსპერტული ქსელით.
2019 წლის მარტიდან ცენტრის ბაზაზე ფუნქციონირებს ილიას უნივერსიტეტის სტუდენტთა ფსიქოლოგიური კონსულტირების ცენტრი. საკონსულტაციო ცენტრის  სამიზნე ჯგუფია ილიას სახელმწიფო უნივერსიტეტის ყველა საფეხურის სტუდენტი. პრობლემათა ნუსხა, რომელსაც პასუხობს სერვისი, არის ფართო:  კრიზისული მდგომარეობები, გავრცელებული ფსიქიკური ჯანმრთელობის მდგომარეობები - შფოთვა, დეპრესია, პოსტ ტრავმული სტრესული აშლილობები, ფსიქოსომატური აშლილობა და სხვ; ასევე, სხვადასხვა სახის ემოციური ან ქცევითი პრობლემები, როგორიცაა კონცენტრაციის დარღვევა, გადაღლა და ა.შ.
სერვისის მიმწოდებლები არიან ილიაუნის ფსიქიკური ჯანმრთელობის სამაგისტრო პროგრამის კურსდამთავრებულები. მათ რეგულარულ ინტენსიურ სუპერვიზიას უწევენ კვალიფიციური სუპერვიზორები.